wulět
zarjadowanja > 2018
Při krasnym lěćnym wjedrje wjedźeše
nas naš lětuši wulět z awtami sobotu, 7. Julija 2018 najprjedy do Worklec. Předsydka Towarstwa kapałki Marije Rejzka Kügerowa bě za
nas wopyt přihotowała a witaše našu skupinku. We Worklecach na ležownosći
něhdyšeje chorownje Maltezow předstaji nam dr. Beno Wałda na jara zajimawe
wašnje stawizny tuteje kónčiny, chorownje a kapałki, kiž je wuhotowana w
krasnym beuronskim stilu. Rjadne sotry běchu so w 70-lětach zašłeho lětstotka
wo wobnowjenje postarali. W kapałce wotměwaja so tři króć wob tydźeń derje
wopytane kemše. Bohužel so wobsedźer pře mało wo hladanje twarskeje substancy
stara a njebě dotal nowym myslam k wužiwanja krasneje ležownosće něhdyšeje
chorownje Maltezow wotewrjeny.
Potom podachmy so na wobjed do
Bóšic, hdźež wobjedowachmy w hosćencu “Gutshof Puschwitz”. Při dobrej jědźi,
piću a bjesadźe nutřka a wonka pod štomami so nam přestawka spěšnje miny.
Po wobjedźe jědźechmy do Smječkec.
Referent Domowiny Pětr Brězan bě za nas wjesny klub skazał a jeho nan Wendelin
Brězan, kiž je so wobšěrnje ze stawiznami Smječkec zaběrał, nam wjele
zajimaweho powědaše: Wo dawnych časach, wo podkopkach, wo winicy, wo třoch
kupjelach, jich rozkřěwje a zańdźenju, ewangelskej cyrkwi, planowanej a ženje
natwarjenej železniskej čarje kaž tež wo młódšich stawiznach wsy. Kak wjesnjenjo
nałožki haja a wjesnu zhromadnosć pěstuja, pokaza so tež w filmje, kiž su
Smječkečenjo k wjesnemu jubilejej před něšto lětami profesionelnje zhotowili a
kotryž sej na kóncu wobhladachmy. Po zhromadnym kofejpiću podachmy so zaso
domoj. Bohužel – najskerje jara sucheho wjedra dla – po puću žórło při něhdyšej
kupjeli a dźensnišej pensiji njenańdźechmy. Woda je bohata na mineralijach a
tež na přikład dobra při chorosćach kože.
Na wuprawje su so wobdźělili dr.
Günter a Martina Holderec, Mehnertec wowka, Hella Helm, z Rakec, z Komorowa Měrćin
Wuhler, Angelika Müselerowa, Ute Müller, Dietmar Heuser a podpisana.
Borbora Felberowa
